തിരുവല്ല: പെന്തക്കോസ്ത് സമൂഹത്തെ അപകീർത്തിപ്പെടുത്തുന്ന തരത്തിൽ വസ്തുതാവിരുദ്ധമായ വാർത്തകളും ആരോപണങ്ങളും പ്രചരിപ്പിച്ചുവെന്ന പരാതിയിൽ ‘രാഷ്ട്രനാളം’ ഫേസ്ബുക്ക് ന്യൂസിനെതിരെ നിയമനടപടി സ്വീകരിക്കുമെന്ന് യുണൈറ്റഡ് പെന്തക്കോസ്ത് കൗൺസിൽ (UPC) ദേശീയ നേതൃത്വം അറിയിച്ചു.സമൂഹമാധ്യമങ്ങളിലൂടെ വാർത്തകളും ആരോപണങ്ങളും പ്രസിദ്ധീകരിക്കുമ്പോൾ വസ്തുതകൾ പരിശോധിക്കേണ്ടത് അനിവാര്യമാണെന്നും, സ്ഥിരീകരിക്കാത്ത വിവരങ്ങളിലൂടെ ഒരു സമൂഹത്തിന്റെ സാമൂഹിക മാന്യതയ്ക്ക് ഹാനി വരുത്തുന്നത് ഗൗരവമായി കാണേണ്ട വിഷയമാണെന്നും UPC നേതൃത്വം വ്യക്തമാക്കി.“വാർത്തയുടെ മറവിൽ ഒരു സമൂഹത്തെ അപകീർത്തിപ്പെടുത്താനുള്ള ശ്രമങ്ങൾ അംഗീകരിക്കാനാകില്ല. വസ്തുതകൾ പരിശോധിക്കാതെയുള്ള ഇത്തരം പ്രചാരണങ്ങൾ സമൂഹത്തിൽ തെറ്റിദ്ധാരണ സൃഷ്ടിക്കും. ഇതിനെതിരെ ആവശ്യമായ നിയമനടപടികൾ സ്വീകരിക്കുകയും നീതി ഉറപ്പാക്കുന്നതിനായി കോടതിയെ സമീപിക്കുകയും ചെയ്യും,” UPC ദേശീയ പ്രസിഡന്റ് ബാബു പറയത്തുകാട്ടിൽ പറഞ്ഞു.പെന്തക്കോസ്ത് സമൂഹത്തിന്റെ അവകാശങ്ങളും സാമൂഹിക മാന്യതയും സംരക്ഷിക്കുന്നതിന് നിയമപരമായി ലഭ്യമായ എല്ലാ മാർഗങ്ങളും സ്വീകരിക്കുമെന്ന് ദേശീയ ജനറൽ സെക്രട്ടറി പാസ്റ്റർ സാബു ജോൺ വ്യക്തമാക്കി. സമൂഹമാധ്യമങ്ങളിലെ ഉള്ളടക്കങ്ങൾ സംബന്ധിച്ച് ഉത്തരവാദിത്തമുള്ള സമീപനവും വസ്തുതാപരമായ പരിശോധനയും ഉറപ്പാക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി.സംഭവവുമായി ബന്ധപ്പെട്ട് ബന്ധപ്പെട്ട അധികാരികൾക്ക് പരാതി നൽകുന്നതുൾപ്പെടെയുള്ള നടപടികൾ സ്വീകരിക്കുമെന്നും, ആവശ്യമായ സാഹചര്യത്തിൽ കോടതിയെ സമീപിച്ച് നിയമപരമായ പരിഹാരം തേടുമെന്നും UPC നേതൃത്വം അറിയിച്ചു.
gospeltvnews
