25 വർഷത്തിലേറെ സുവിശേഷ ശുശ്രൂഷ ചെയ്ത ദൈവദാസന്മാരെ ആദരിച്ചു
ചേറ്റുകുഴി: പാസ്റ്റേഴ്സ് ഫെഡറേഷൻ ഓഫ് കൗൺസിൽ (PFC) ചേറ്റുകുഴി യൂണിറ്റിന്റെ ഉദ്ഘാടനവും 25 വർഷത്തിലേറെയായി സുവിശേഷ ശുശ്രൂഷയിൽ സമർപ്പിതരായി പ്രവർത്തിച്ചുവരുന്ന പാസ്റ്റർമാരെ ആദരിക്കുന്ന ചടങ്ങും ചേറ്റുകുഴി എൽ ബഥേൽ ചർച്ചിൽ സംഘടിപ്പിച്ചു. പെന്തക്കോസ്ത് സമൂഹത്തിലെ ശുശ്രൂഷകരുടെ ആത്മീയ ഐക്യവും സഹകരണവും ശക്തിപ്പെടുത്തുന്നതിനൊപ്പം ദീർഘകാലം സുവിശേഷ വേലയിൽ വിശ്വസ്തരായി പ്രവർത്തിച്ച ദൈവദാസന്മാരെ ആദരിക്കുകയെന്ന ലക്ഷ്യത്തോടെയായിരുന്നു പരിപാടി.
PFC ചേറ്റുകുഴി യൂണിറ്റ് പ്രസിഡന്റ് പാസ്റ്റർ സാജൻ പി. വൈ. അധ്യക്ഷത വഹിച്ചു. പാസ്റ്റർ ബിനോഷ് തങ്കച്ചൻ സ്വാഗതം ആശംസിച്ചു. ഉടുമ്പൻചോല എം.എൽ.എ അഡ്വ. സേനാപതി വേണു യൂണിറ്റിന്റെ ഔദ്യോഗിക ഉദ്ഘാടനം നിർവഹിച്ചു.കരുണാപുരം ഗ്രാമപഞ്ചായത്ത് പ്രസിഡന്റ് ശ്രീ. ബിനു വി. എസ്. മുഖ്യപ്രഭാഷണം നടത്തി. വർഷങ്ങളായി സുവിശേഷ ശുശ്രൂഷയിൽ തുടരുന്ന പാസ്റ്റർമാരുടെ സമർപ്പണവും ത്യാഗവും സമൂഹത്തിന് നൽകുന്ന ആത്മീയ സംഭാവനകളും ചടങ്ങിൽ അനുസ്മരിച്ചു.PFC സംസ്ഥാന ജനറൽ സെക്രട്ടറി പാസ്റ്റർ സുരേഷ് പോൾ ദീർഘകാലം ശുശ്രൂഷയിൽ തുടരുന്ന പാസ്റ്റർമാരെ ആദരിക്കുന്ന ചടങ്ങിന് നേതൃത്വം നൽകി. സുവിശേഷ ശുശ്രൂഷയിൽ ദീർഘകാലം വിശ്വസ്തതയോടെ നിലകൊണ്ട ശുശ്രൂഷകരെ ആദരിക്കുന്നത് പുതിയ തലമുറയിലെ ശുശ്രൂഷകർക്ക് പ്രചോദനമാകുമെന്ന് അദ്ദേഹം പറഞ്ഞു.നെടുങ്കണ്ടം ബ്ലോക്ക് പഞ്ചായത്ത് മെമ്പർ ശ്രീമതി മിനി പ്രിൻസ്, വാർഡ് അംഗം പി. ടി. വർക്കി, നാലാം വാർഡ് മെമ്പർ ശ്രീ. രാജൻ, സി.പി.എം. കമ്പംമെട്ട് ലോക്കൽ കമ്മിറ്റി സെക്രട്ടറി സി. എം. ബാലകൃഷ്ണൻ, കെ.എസ്.ടി.യു. വണ്ടൻമേട് സെക്രട്ടറി ശ്രീ. കെ. ടി. ഫാസി, PFC സംസ്ഥാന സെക്രട്ടറി പാസ്റ്റർ ബാബു എം. എം., കമ്മിറ്റി അംഗങ്ങളായ പാസ്റ്റർ പീറ്റർ ജോർജ്, പാസ്റ്റർ ഹാനോക്ക് കെ. എച്ച്., പാസ്റ്റർ രാജേഷ് കട്ടപ്പന എന്നിവർ ആശംസകൾ അർപ്പിച്ചു.സിസ്റ്റർ ലിസ്സിമോൾ സാജൻ ആദരിക്കപ്പെട്ട ശുശ്രൂഷകരുടെ പ്രശംസാപത്രം വായിച്ചു.
ദീർഘകാല സുവിശേഷ ശുശ്രൂഷകരെ ആദരിച്ച ചടങ്ങ് പെന്തക്കോസ്ത് സമൂഹത്തിലെ ശുശ്രൂഷകരുടെ സേവനത്തോടുള്ള ആദരവും നന്ദിയും പ്രകടിപ്പിക്കുന്നതായി മാറി.പുതുതായി രൂപീകരിച്ച PFC ചേറ്റുകുഴി യൂണിറ്റിലൂടെ പ്രദേശത്തെ പാസ്റ്റർമാരെയും ശുശ്രൂഷകരെയും കൂടുതൽ ഏകോപിപ്പിച്ച് ആത്മീയ കൂട്ടായ്മയും സഹകരണവും ശക്തിപ്പെടുത്തുന്നതിനുള്ള പ്രവർത്തനങ്ങൾ മുന്നോട്ടുകൊണ്ടുപോകുമെന്ന് ഭാരവാഹികൾ അറിയിച്ചു.
Report Pastor Kuriakose M Kudakkachira
in
