കൊന്നത്തടി: ഇടുക്കി ജില്ലയിലെ കൊന്നത്തടിയിൽ കാൻസർ രോഗബാധിതയായ സഹോദരിയുടെ ഉപജീവനമാർഗമായിരുന്ന പെട്ടിക്കട സാമൂഹ്യവിരുദ്ധർ തല്ലിത്തകർക്കുകയും കടയിലുണ്ടായിരുന്ന സാധനങ്ങൾ കവർന്നുകൊണ്ടുപോകുകയും ചെയ്ത സംഭവം വീണ്ടും ശ്രദ്ധേയമാകുന്നു. കുറച്ചുനാൾ മുമ്പ് നടന്ന സംഭവം അന്ന് പ്രദേശത്ത് ഏറെ വേദനയുണ്ടാക്കിയിരുന്നു.രോഗവും സാമ്പത്തിക പ്രതിസന്ധിയും മൂലം ജീവിതം മുന്നോട്ടുകൊണ്ടുപോകാൻ പ്രയാസപ്പെട്ടിരുന്ന സഹോദരിക്ക് ഒരു കൈത്താങ്ങാകുക എന്ന ലക്ഷ്യത്തോടെയാണ് പെട്ടിക്കട ആരംഭിക്കുന്നതിനാവശ്യമായ സാധനങ്ങൾ വാങ്ങിനൽകി സഹായിച്ചത്. അന്ന് സഭാ ശുശ്രൂഷകനായിരുന്ന പാസ്റ്റർ ബിധുമോൻ ജോസഫിന്റെ നേതൃത്വത്തിലും ഇടപെടലിലുമായിരുന്നു സഹായപ്രവർത്തനം സംഘടിപ്പിച്ചത്. ഉപജീവനമാർഗം ഒരുക്കുന്നതിനൊപ്പം പ്രാർത്ഥനയിലൂടെയും ആത്മീയ പിന്തുണയിലൂടെയും അവർക്ക് ആശ്വാസം പകരാനും ശ്രമിച്ചിരുന്നു.എന്നാൽ പിന്നീട് സാമൂഹ്യവിരുദ്ധർ പെട്ടിക്കട തല്ലിത്തകർക്കുകയും സാധനങ്ങൾ കവർന്നുകൊണ്ടുപോകുകയും ചെയ്തതോടെ കുടുംബം വീണ്ടും ദുരിതത്തിലായി.നിലവിൽ യുണൈറ്റഡ് പെന്തക്കോസ്ത് കൗൺസിൽ (യു.പി.സി.) ഇടുക്കി ജില്ലാ പ്രസിഡന്റായും ക്രൈസ്തവധാരാ പത്രത്തിന്റെ നെടുങ്കണ്ടം റിപ്പോർട്ടറായും പ്രവർത്തിക്കുന്ന പാസ്റ്റർ ബിധുമോൻ ജോസഫ്, ഇപ്പോൾ വീട്ടിൽ വിശ്രമിക്കുന്ന സഹോദരിയെ വീണ്ടും നേരിൽ സന്ദർശിച്ച് സ്ഥിതിഗതികൾ അന്വേഷിക്കാനും സാധ്യമായ ആശ്വാസവും പിന്തുണയും നൽകാനും ആഗ്രഹിക്കുന്നു.മദ്യത്തിന്റെയും മയക്കുമരുന്നിന്റെയും സ്വാധീനം നിലനിൽക്കുന്ന പ്രദേശങ്ങളിൽ സാമൂഹികവും ആത്മീയവുമായ മാറ്റത്തിന്റെ ആവശ്യകതയിലേക്കാണ് ഈ സംഭവം വിരൽചൂണ്ടുന്നത്. ലഹരിയുടെ പിടിയിൽനിന്ന് സമൂഹത്തെ മോചിപ്പിക്കാനും ദൈവിക സമാധാനവും സ്നേഹവും സഹജീവികളോടുള്ള കരുതലും വളർത്തിയെടുക്കാനും എല്ലാവരുടെയും പ്രാർത്ഥനയും സഹകരണവും അഭ്യർത്ഥിക്കുന്നു.
