ഉത്തർപ്രദേശിലെ ഗാസിയാബാദിൽ പതിനേഴുകാരനായ സൂര്യ പ്രതാപ് ചൗഹാന്റെ കൊലപാതകവുമായി ബന്ധപ്പെട്ട കേസിൽ നിർണായക വഴിത്തിരിവ്. കേസിലെ പ്രധാന പ്രതിയായ അസാദ് പോലീസുമായുള്ള ഏറ്റുമുട്ടലിൽ കൊല്ലപ്പെട്ടതായി അധികൃതർ അറിയിച്ചു.
മെയ് ഇരുപത്തിയെട്ടിന് ഗാസിയാബാദിലെ ഖോഡ കോളനിയിലായിരുന്നു സംഭവം നടന്നത്. ബക്രീദ് ആഘോഷത്തിന്റെ ഭാഗമായി സുഹൃത്തായ അസാദ് വീട്ടിലേക്ക് ക്ഷണിച്ചതിനെ തുടർന്നാണ് സൂര്യ പ്രതാപ് ചൗഹാൻ അവിടെയെത്തിയത്.കുടുംബത്തിന്റെ ആരോപണമനുസരിച്ച്, ആടിനെ അറുക്കുന്ന ചടങ്ങ് കാണാൻ സൂര്യയെ നിർബന്ധിച്ചു. എന്നാൽ ഒരു ജീവിയെ കൊല്ലുന്നതിനോട് താൽപര്യമില്ലെന്ന് പറഞ്ഞ് സൂര്യ ഒഴിഞ്ഞുമാറാൻ ശ്രമിച്ചു. ഇതിന് പിന്നാലെ ആടിനെ അറുക്കാൻ ഉപയോഗിച്ച കത്തി കൊണ്ട് സൂര്യയെ ആക്രമിക്കുകയായിരുന്നുവെന്നാണ് ആരോപണം.ആദ്യ ആക്രമണത്തിന് ശേഷം ജീവൻ രക്ഷിക്കാൻ സൂര്യ ഓടിപ്പോകാൻ ശ്രമിച്ചു. ഏകദേശം ഇരുന്നൂറ് മീറ്ററോളം ഓടിയെങ്കിലും അക്രമികൾ പിന്തുടർന്ന് വീണ്ടും ആക്രമിച്ചതായി കുടുംബം പറയുന്നു. നിരവധി കുത്തേറ്റതിനെ തുടർന്ന് റോഡിൽ കുഴഞ്ഞുവീണ സൂര്യയെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.സംഭവം സംസ്ഥാനത്താകെ വലിയ ചർച്ചകൾക്കും പ്രതിഷേധങ്ങൾക്കും കാരണമായി. കുറ്റക്കാർക്കെതിരെ ശക്തമായ നടപടി സ്വീകരിക്കണമെന്ന് മുൻ മുഖ്യമന്ത്രി മായാവതിയും ആവശ്യപ്പെട്ടു.
മകന്റെ മരണത്തിൽ നീതി ലഭിക്കണമെന്ന് ആവശ്യപ്പെട്ട് സൂര്യയുടെ മാതാവ് മുഖ്യമന്ത്രി യോഗി ആദിത്യനാഥിനോട് അഭ്യർത്ഥിച്ചിട്ടുണ്ട്. സൂര്യയെ പ്രലോഭിപ്പിച്ചാണ് സംഭവസ്ഥലത്തേക്ക് വിളിച്ചുവരുത്തിയതെന്ന് സഹോദരിയും മൊഴി നൽകിയിട്ടുണ്ട്.കേസിൽ അഞ്ച് പേരെ പ്രതികളാക്കിയതായി ഡെപ്യൂട്ടി പോലീസ് കമ്മീഷണർ ധവാൽ ജയ്സ്വാൾ അറിയിച്ചു. പ്രധാന പ്രതിയായ അസാദിനെ കണ്ടെത്തുന്നതിനായി പോലീസ് വ്യാപകമായ തിരച്ചിലും റെയ്ഡുകളും നടത്തിയിരുന്നു.പോലീസ് വളഞ്ഞപ്പോൾ അസാദ് പോലീസിന് നേരെ വെടിയുതിർത്തെന്നും, തുടർന്ന് നടന്ന ഏറ്റുമുട്ടലിലാണ് ഇയാൾ കൊല്ലപ്പെട്ടതെന്നും പോലീസ് വ്യക്തമാക്കി.
അസാദിന്റെ പിതാവ് നവാബും സുഹൃത്തുക്കളായ ഫർഹാൻ, അതിഫ് ഉൾപ്പെടെയുള്ളവരും അറസ്റ്റിലായിട്ടുണ്ട്.പ്രതികൾ രക്ഷപ്പെടാതിരിക്കാൻ ഗാസിയാബാദിന് പുറത്തേക്കുള്ള പ്രധാന വഴികൾ പോലീസ് അടച്ചിരുന്നു. പ്രതികളെക്കുറിച്ചുള്ള വിവരം നൽകുന്നവർക്ക് അമ്പതിനായിരം രൂപ പാരിതോഷികവും സർക്കാർ പ്രഖ്യാപിച്ചിരുന്നു.രഹസ്യ വിവരത്തെ തുടർന്ന് ഖോഡ-ഇന്ദിരാപുരം മേഖലയിലെത്തിയ പോലീസ് പ്രതികളെ വളഞ്ഞു. രക്ഷപ്പെടാൻ ശ്രമിക്കുന്നതിനിടെയാണ് അസാദ് പോലീസുമായുള്ള ഏറ്റുമുട്ടലിൽ കൊല്ലപ്പെട്ടതെന്ന് അധികൃതർ അറിയിച്ചു.
Gospel News
