ദുബൈയിൽനിന്ന് ഇസ്രയേലിലെ തെൽ അവീവിലേക്ക് പുറപ്പെട്ട ഫ്‌ളൈദുബൈ വിമാനം സൗദി അറേബ്യയിൽ അടിയന്തരമായി ഇറക്കിയ സംഭവത്തിൽ അത്യന്തം ഭീതിജനകമായ വിവരങ്ങൾ പുറത്ത്. വിമാനം റാഞ്ചിയെന്ന വ്യാജ സന്ദേശവും കോക്പിറ്റിലെ തർക്കവുമല്ല, മറിച്ച് യാത്രാവിമാനം തകർക്കാൻ പൈലറ്റുമാരിലൊരാൾ മനഃപൂർവം ശ്രമിച്ചതാണ് ദുരന്തമുഖത്ത് എത്തിച്ചതെന്നാണ് പുതിയ റിപ്പോർട്ടുകൾ വ്യക്തമാക്കുന്നത്. ആകാശച്ചുഴിയിൽ നൂറുകണക്കിന് യാത്രക്കാരുടെ ജീവൻ അപകടത്തിലാക്കി വിമാനം താഴേക്ക് ഇടിച്ചിറക്കാൻ ശ്രമിച്ച പൈലറ്റിനെ, സഹപൈലറ്റും വിമാനത്തിലുണ്ടായിരുന്ന ഏതാനും യാത്രക്കാരും ചേർന്ന് സാഹസികമായി കീഴ്‌പ്പെടുത്തുകയായിരുന്നുവെന്ന് ‘ടൈംസ് ഓഫ് ഇസ്രയേൽ’ റിപ്പോർട്ട് ചെയ്യുന്നു.
ദുബൈ അന്താരാഷ്ട്ര വിമാനത്താവളത്തിൽനിന്ന് ബെൻ ഗുറിയോൺ വിമാനത്താവളത്തിലേക്ക് പുറപ്പെട്ട എഫ്ഇസഡ് 1225 ബോയിങ് 737 മാക്‌സ് വിമാനം സൗദി വ്യോമാതിർത്തിയിലൂടെ പറക്കുമ്പോഴാണ് അവിശ്വസനീയമായ സംഭവങ്ങളുടെ തുടക്കം. യാത്ര സാധാരണ നിലയിൽ പുരോഗമിക്കുന്നതിനിടെ പൈലറ്റുമാരിലൊരാൾ വിമാനത്തിന്റെ നിയന്ത്രണം അസ്വാഭാവികമായ രീതിയിൽ താഴേക്ക് തിരിക്കാൻ ശ്രമിക്കുകയായിരുന്നു. യാത്രാവിമാനം നിലത്തേക്ക് ഇടിച്ചിറക്കാനുള്ള ഈ നീക്കം പെട്ടെന്ന് തന്നെ ഒപ്പമുണ്ടായിരുന്ന സഹപൈലറ്റിന്റെ ശ്രദ്ധയിൽപ്പെട്ടു.വിമാനത്തിന്റെ നിയന്ത്രണം തിരിച്ചുപിടിക്കാൻ ശ്രമിച്ച സഹപൈലറ്റിനെ ഇയാൾ ശാരീരികമായി നേരിട്ടു. കോക്പിറ്റിനുള്ളിൽ ഇരുവരും തമ്മിൽ കടുത്ത മൽപിടുത്തം നടന്നു. അപകടം മണത്ത സഹപൈലറ്റ് കോക്പിറ്റിന്റെ വാതിൽ തുറന്ന് യാത്രക്കാരോട് സഹായം അഭ്യർത്ഥിക്കുകയായിരുന്നു. തുടർന്ന് മുന്നിലെ നിരകളിലിരുന്ന ധീരരായ ഏതാനും യാത്രക്കാർ ഉടനടി കോക്പിറ്റിലേക്ക് ഇരച്ചെത്തുകയും സഹപൈലറ്റിനൊപ്പം ചേർന്ന് ആക്രമണകാരിയായ പൈലറ്റിനെ ബലപ്രയോഗത്തിലൂടെ കീഴ്‌പ്പെടുത്തുകയുമായിരുന്നു. ഇയാളെ സീറ്റിൽ ബന്ധിച്ച് അടിയന്തര സാഹചര്യം ഒഴിവാക്കാൻ കഴിഞ്ഞതാണ് വൻ വ്യോമദുരന്തം ഇല്ലാതാക്കിയതെന്നും റിപ്പോർട്ടുകൾ സൂചിപ്പിക്കുന്നു.മൽപിടുത്തത്തിനിടെ അബദ്ധത്തിൽ ട്രാൻസ്‌പോണ്ടർ കോഡ് മാറിയതാണ് വിമാനം റാഞ്ചിയെന്ന സൂചന നൽകുന്ന 7500 എന്ന അടിയന്തര അപായ കോഡിലേക്ക് എത്തിയതെന്നാണ് യാത്രക്കാർ നൽകുന്ന സൂചന.
പശ്ചിമേഷ്യയിൽ ഇസ്രയേൽ അതിർത്തികളിലും ഫലസ്തീനിലെ ഗസ്സയിലും കടുത്ത സംഘർഷാവസ്ഥ നിലനിൽക്കുന്നതിനാൽ ഈ കോഡ് വലിയ ഭീതി സൃഷ്ടിച്ചു. വിമാനം ഭീകരർ റാഞ്ചിയെന്ന് ഭയന്ന് ഇസ്രയേൽ വ്യോമസേന തങ്ങളുടെ യുദ്ധവിമാനങ്ങൾ അടിയന്തരമായി ആകാശത്തേക്ക് അയക്കുകയും ചെയ്തു.എന്നാൽ, ഭീകരാക്രമണമല്ലെന്നും കോക്പിറ്റിലെ ആഭ്യന്തര പ്രതിസന്ധിയാണെന്നും വ്യക്തമായതോടെ വിമാനം ഏറ്റവും അടുത്തുള്ള സൗദി തബൂക്കിലെ അന്താരാഷ്ട്ര വിമാനത്താവളത്തിലേക്ക് തിരിച്ചുവിട്ടു. പരിക്കേറ്റ സഹപൈലറ്റ് വിമാനത്തിന്റെ പൂർണ നിയന്ത്രണം ഏറ്റെടുത്ത് സൗദി എയർ ട്രാഫിക് കൺട്രോളിന്റെ സഹായത്തോടെ വിമാനം റിയാദിൽ സുരക്ഷിതമായി ലാൻഡ് ചെയ്തു. ലാൻഡിങ്ങിന് പിന്നാലെ അക്രമം കാട്ടിയ പൈലറ്റിനെ സൗദി സുരക്ഷാ സേന കസ്റ്റഡിയിലെടുത്തതായാണു വിവരം.പൈലറ്റ് ഇത്തരമൊരു കടുംകൈക്ക് മുതിർന്നതിന്റെ കാരണം കണ്ടെത്താൻ അന്താരാഷ്ട്ര രഹസ്യാന്വേഷണ ഏജൻസികൾ വിശദമായ അന്വേഷണം ആരംഭിച്ചിട്ടുണ്ട്. ഇയാളുടെ മാനസികനിലയിലുണ്ടായ പെട്ടെന്നുള്ള വ്യതിയാനമാണോ അതോ മറ്റ് ലക്ഷ്യങ്ങളോ ഗൂഢാലോചനകളോ ഇതിന് പിന്നിലുണ്ടോ എന്ന കാര്യമാണ് സുരക്ഷാ വിഭാഗം പരിശോധിക്കുന്നത്. കോക്പിറ്റ് വോയ്‌സ് റെക്കോർഡറും ഫ്‌ലൈറ്റ് ഡാറ്റാ റെക്കോർഡറും വിശദമായ പരിശോധനയ്ക്കായി എയർലൈൻ അധികൃതർ പിടിച്ചെടുത്തു.
